Isaak Pasian cih leh Pasian in Abraham kiang ah na tapa isaak tawh kei nongbia ding hi ci in na ze-et a tua lai ah Abraham in ata pa Isaak biakpiakna ding in hen a thah asawm laitak in Isaak athumanglo mi hi leh kihem in apa khutsung pan suahtak ding hanciam leh kitom khia zo mahmah ding hi. Bang hang hiam cih leh Lai Siangtho sung ah Abraham in anasem te kiang ah no hi mun ah nong ngak un hua lai ah kei leh tangvalpa biak piakna pia ding in ka va pai ding uh hi ci ahih man in tua hun in Isaak tangval ta cih kimu thei hi. Hih pen Isaak nun takna ah amasa ama thumanna imuhna ahihi.
Anih na ah Abraham hong teek ciang in atapa zi ding in Isaak zong dong se lo in anasem pa kiang ah ka tapa zi ding ka behte kiang ah va zong in ci in sawl hi. Hih thu pen Isaak in nak theih mahmah ding a ahi zong a pa kiang ah’ ka zi ding pen kei man zong ding hing, kei ading ahih man in kei deih mah zong ning ci in kamkhat beek anialna Lai Siangtho ah mulo hi hang. Tua hi a Christianten Isaak bang a athumang nuntakna I neih ding thupi a thu I man zawh kei leh zong Topa aw a thumang nuntakna hongpia in kei hanciamna tawh ka hizo peuhmah kei hi ci a thu inget ding pen thupi mahmah hi. Bang hang hiam cih leh biak piakna sang in thu manna adeih zaw i Topa hi. Adiak in tuhun teh khangno tampi tak te in kazi ding ka pasal ding kei man zong ding hing ci in nu leh pa te tung ah asanggam te kiang khawngah gengen thei uh hi. Hih zong hoih mah hi, ama ading ahih man in ahi zong in zi ding pasal ding I zon khialh leh I khantawn tung eima hamsiatna ahih man in hoihtak in ngaihsun nute pate mah tawh kikup tangtang ding pen thupi mahmah kasa hi. Tua bang in thumang tak a nu leh pa te tawh kikum khawm a zi-neih pasal neihna pen Topa lungkimna hong hi pah a Pasian i tung ah hong lungkim naknak aleh imaban ding peh hong limci mahmah pah hi.
Tuni dong mah Isaak Pasian ci a min aki lawhlawh na pen Isaak i upna, thu manna te Topa in thupi sa ahih man in Isaak asih zawh kum tampi ahih khit hang in hih thu te mah ei te tung tu ni dong in hongthak suaksak zel in tha hongpia zel hi. Hih bang in Isaak in a thumanna tawh Topa i Pasian ama tung ah na lungkim ahih man in Isaak Pasian ci in tuni dong mah amin ki-lolo lai ahihi. Ei Christian mimal kim zong Isaak mah bang in a thumang nuntakna nei a Topa lungkimna angah te ahi ding in iTopa in thupha hongpia kim ciat ta hen.
Jacob Pasian mai ah zom kik ni…
[Pa Peter Lian pen tulaitak HMC ah Upa Lutangpi asep laitak ahi hi]