Nung deuh Advertisement khat ah “Get iPhone X for $ 1 only” ci mawk. A thulimtak simsim khit ciang a min khumman na bek na hi zawsawp pan mawk hi. Leitung leh vantung, a sung a mi leh a piang khempeuh Bawl-Pa paizia pen mi khempeuh in ki zui ahih lam hong phawksak thak thak hi. Topa aw Thupha hong pia in, inn lei zawh na ding thupha, bill khempeuh piak zawh na ding thupha hong pia in ci in thuki ngen thei hi. I nget khempeuh Topan hong pia thei lua mahmah hi, ahi zong Topan I upna hong sit masa gige a hih lam phawk ni.
Tapa Hong Pia (Piancilna 15:2-5; 21:2): Topan, Abraham kiang ah “Vantung lam enin aksite sim in; na sim thei hiam?” a ci hi. Tua ciangin amah in, “Na suanlekhakte, tua mah bang ding hi,” a cih lai in tapa nei nai peuh mahlo, zong a Sarah naupai thei non ding zong ki lawmlo hi. Hih thu pen tulai pau leh a “Vaisah Mahmah” khat hi, Topan Abraham a sap lai mahmah in zong, a Up mahmah zong a lamdangpi hi. Hih hang mah in Upna phungpi ci’n Abraham in min ngah hi. Sarah a tek khit in tapa Issac nei hi.
Piakna (Piancilna 22:8-14): Amah in, “Na it, na tapa neihsun Isaac, la in la Moriah gamah pai in. Tua lai muna nang kiangah kong gen ding mual khat tungah meihal biakpiakna-in amah hong pia in,” a ci hi. Piancilna 22:2. Tekkhit dikdek nung in Topan Abraham leh Sarah tapa Issac pia in tun meihal biak piakna ding in Topan ngen kik hi. Abraham leh Sarah in bang teng a ngaihsun ding uh hiam? Zan bangzah imulo I a om ding uh hiam cih ki theilo hi. Meihal biakpia ding a pai lai un Abraham in bang teng a ngaihsun diam? A music paipaita, a la ding ki phuak nailo I cih uh tawh ki bang hi.
Zawhna (Joshua 6:12-20): Tua ciangin Topa in Joshua kiangah, “Thei in, na khutsungah a kumpipa leh a mi thahatte tawh Jerikho khua kong pia khin hi. (Joshua 6:2) Topan kong pia khin hi cinapi Jerikho kimkot in 7 na pai ding uh hi cih thupia se hi. Ni 7 sung vingveng khulhpi pualam giah uh a, nikhat in kulhpi khatveita kimkot in pai uh hi. Jerikho khua-miten a muh uh ciang lamdangsa mahmah kha ding uh hi; a en in buai mahmah kha ding uh hi. Hih bang galdo na pen leitung piancil pan a khatveina hi pah hi.
Messiah (Piancilna 3:15; Luka 2:25-30): Topa’ hong ciamsa Khrih a muh matengin a sihlohna ding thu zong ama tungah Kha Siangtho in na genkhin hi (Luka 2: 26). Simeon a kum a ki gelhloh hang in tek mahmah tuak hi, a hang bel Kha Siangtho in Jesu Khrist a muh dong a sihloh na ding na ciam hi. Thuciam thak sung ah Simeon bek mah Topan a nuntakna a huh a behlapsak-pa ci leng ki khial lua lo ding hi.
Damna (Matthai 15:22-28): Kannan numeinu in a tanu dawi-vei Jesu kiang ah a damna ding a van get lai in Jesu in na nolh a Isrealte a ding pai a hih lam gen hi. “Nupi in, “Hi mah hi, Topa aw; a topa sabuai tung panin a kia annengte, ui khawite in zong nebuang hilo ahi hiam?” a ci hi. Matt 15 :27”.
Suakta (Sawltak 12:5-7): Peter thong ah a omlai in a khutnih in sikhau tawh ki kilh bek hilo, galkap nih kal ah ki lumsak hi lai hi. Suakta ding cih mahmah lampi om vetlo hi, tua bek hilo in a kong cingte om lai sawnsawn uh hi. Kong zong muhkhat bek ah om hilo lai hi.
Topan thupha a hong piak ding ciang in tangtak in hong pia masa ngeilo ahih lam I thei ding hi. Tawlkhatpi khat hong ngaksak, hong thuaksak masa, hong sawl masa, hong behlapsak, a thupi pen I Upna hong sit masa hi. Ei thumiten hih Topa hong sitnate kip hawk pahpah khalo hi. Jerikho kulhpi 7 vei kimvelh sese kisamlo in Jerikho khuapi a pia thei Pasian hi, ahi zong a miten a thu a mang hiam cih sitna hizaw hi. A hoihzaw ding Topan hong deihsak in Simeon bang hong ngaksak zong omkha ding hi. Kannan numei nu upna bang nei leng ei tawh a ki lawmlo zah dong thupha in ngah thei lai hi. Vantungmi in Peter thong pan a va suaktak sak lai in Peter in a takpi mah a hih lam zong theilo in a mangmu bang in ki tuat liang hi. Topan ei a thuum-mite thupha a tamzaw sem hong pia nuam lai hi, hih a thuphate hong piang nang tu a I tuak I haksatna leh buai nate pen hong ze-etna zong hi kha ding hi. Topa thupha a zang ding leh hong sitnate a zo ding in Topan thupha hong piatek hen!
(Laigelhpa Tg Pau Go Khai @MC Khai pen tulaitak HMC Media Director tavuan len ngei hi)