“Na buk mun khan inla, na teenna puanbukte kizalsak in;
cil bawl kei in, na khaute sausak inla, na khetphimte kipsak in.
Israel mite in Egypt gam ah kum 400 sung sal a taang khit ciangin, Moses makaihna tawh Pasian’ kamciam gam ahi Canaan gam pen kum (40) khit ciangin hong tung uh hi. Kamciam gam ahi bawngnawi leh khuaizu a tamna gamah kum tampi hong ten khit zawh uh Pasian’ tungah citaklo in, nung ngatsan kha uh ahih manun a galte khutsung ah tungkik uh hi. Babylon khutnuai ah kum (70) sung (Jeremiah 29:10) sal hong taang kik uh in, Israel minam lakpan a pil pen, a siam pente kiman in, a neih leh lam leh inn leh lote ki haltum, ki suksiat sak khin mang hi. A galte in sila in man in, sal tang in a om laitak un (Late 137:1-6) ah a khasiatna uh, khuangai in, a gam lui uh a kibuknapi Zion ngai in la hong sa uh hi. Hih khuangaihna la pen “Rivers of Babylon” ci-in 1978 in Boney M te in hong sa khia uh hi.

Isaiah 54:2 (Alian 40-66) pen lametbei in, ngiautau in, pangpa kisa in a om hun laitak un pasian in kamsang Isaiah tungtawn in a hopihna leh lapetna a pulaksakna ahi hi. Israel minamte’ adingin hun haksa pen a thuak laitak leh, khangno, kum hoih cidam laite in agam uh ah a ciah kik theih ding thu hong om laitak in lametna kammal ahi, “Na buk mun khan inla, na teenna puanbukte kizalsak in; cil bawl kei in, na khaute sausak inla, na khetphimte kipsak in…” cih tawh Pasian hopihna ngah uh hi.

Pasian in bang hangin buk mun khan ding sawl ahi hiam?

Buuk icih pen taang lai pek Abraham, Isaac, Jacob te a kipan a khualzinna ah a zat uh, a omna inn uh hi a, sehnel gam ah khualzin vakvai in a om sung un zong beek mah zang in a nungta uh ahi hi. Buk pen a sung a om zah ding mimal phazah dungzui in khan tohtoh a kul ahi hi. Puan mongte zal in, sausak in, behlap a, innkuan ki behlap ding, suan leh khak ki behlap ding genkholhna ahi hi. Abraham tung a Pasian’ kamciam a tangtun nading zong ahi hi. Israel minamte bek hilo Gentle mite tawh kizopna khangto ding a, upna leh Pasian’ muanna lam ah kip kho ding laksakna zong ahi hi.

Lai Siangtho sungah buk nuntak pen Pasian’ mite’ nuntak zia tawh tehkakna nei hi. Pasian in ama minamte ki behlap sak in, khangsak nuam ahih manin bukmun khan ding a vaikhak ahi hi. Upna tawh a nungta, Khazih taangmite in Pasian’ kiang pan hong pai ding thupha, khantohna leh phung cin saknate adingin kigin kholh nading hong musak hi. Upna pen I khan zawh zahzah tung ah kingah in Pasian’ hoihna a kimu toto ding ahihna pen (2 Kum. 4:3-7) ah kimu thei hi. Elisa in meigongnu’ sathau um sung ah, um a kaihkhop zawh zahzah a dimin a thun mahbang in; Joshua leh a pawlte in Jordan gun a kan ding un, a khe tawh a sikna tantan a gam suaksak ding cih sawlna (Joshua 1:3) mah bangin upna tawh kalsuan ding a deih Pasian ahi hi. Hih Lai Siangtho mun sung a mahbangin Pasian in amite’ tungah a lungsim, ngaihsutna leh a muanna uh khan in, upna tawh kalsuan in, a mainawt ding a deih hi. Ciil bawl lo ding, veil eh tak ah khang cing in, ki behlap ding pen Pasian’ deihna hi.

Khangcing in, ki behlap ding pen Pasian’ deihna ahi hi. (Matthew 28:19) sungah “…note pai unla, midang khempeuh, keima nungzui mi suaksakin…” ci hi. Nungzui suak ki behlap nading, minam kim tungah Pasian’ thu tangko nading pen Pasian’ geelna leh deihna ahi hi. (John 4:35) sungah, “…An khempeuh min khinta a, lak ding bek in sam hi.” Zeisu’ hong paikik ding nai mahmah ta ahih manin, kha mangthang tampi tak Topa kiang puak ding pen ama hong sawlna leh a deihna ahi hi. Pasianin kamciam hong piangam ahih manin, hong pia lahlo ding cihna ahi hi.

Pasian’ teelsa Israel mite in uplahna tawh Pasian a nungngat khak uh ciangin a maban uh tampi ziakai in, lamsaupi tawn kha uh hi. Tua bang haksatna a tuah uh ciangin, Pasian’ kiangah kiko kik in huhna a nget uh ciang, kamciamsate tangtung sak in, lametna thak a pia hi. Pasian I nungngak khak ciangin I khantoh nading hun manpha tampi mawk bei in, pammaih lua ahihna kamsang Isaiah tungtawn in kimu thei hi. Tua mahbangin Pasian hong hopihna kammalte, hong kamciamsa thute phawk gige in upna tawh kalsuan in, nungta ding hi hangh.

Ih upnate khan in, I ngiman leh tupnate taangzai sak ding hi hangh. Pasian in Abraham tungah kamciam a piak lai in, Noah tungah thu a gen lai in, a pianglo ding tawh kibang mah ta leh, a hun tun ciang hong tangtung veve hi. Upna tawh kalsuan ngam in, nungta ding hi hangh. Tua pen bukmun khanna ahi hi. Buk mun khan tawh, khetphim kip kho sak ding a kisap mah bangin, Pasian’ sung, ama kammal sung ah thullut in, bulkip upna, ama tung ah I neih kul hi. Upna tawh kalsuan in, Topa muanna tawh masuan ding hi hangh. Tua pen Pasian’ hong kamciamna leh ama deihna ahi hi.

(Laigelh Sia Disciple Kap Sian pen Hosanna Mission Church ah Executive Pastor hi)