Haksatna leh sihna a thuak ni (#GoodFriday) bang hangin (good) kici hiam?

Lai Siangtho sungah, Zeisu’ hong sihna ih phawk nadingin ih neih ding leh i zat dingin “nekkhawm bawlna” tawh sawlna hong nei hi. (I Cor 11:24-26)

Good Friday/ Holy Friday/ Silence Friday: Bang hangin (Good Friday) kici hiam?

Zudah makaite leh Zawmah galkapte in Zesu hong thahsakna leh hong bawlsiat sakna (Matthew 26-27) pen hoih ici thei mah ding hiam?

Hosanna, Hosanna ci-in pahtawina leh kikona a nei ziahziah mipite mahin, “That un, that un…” (Matthew 27:22) ci-in a kikona pen hoih mah ahi hiam?

-A ki bawlsiatnate hoihlo hinapi in, hong thuakna a (hang) a hoih ahi hi.

“…mangbuhhum tang khat leilakah kituhin si masa kei leh tang khat bek mah hi ngitnget hi; ahi zongin si masa leh tang tampi tak hong nei thei hi.” (JOHAN‬ ‭12:24‬)

Zeisu hong sihna pen khaici bangin hong kituhna ahi hi. Hong pokik dinga, tampi hong phading hi. Leitungbup ading a kicing nuntakna khaici hong suak theih nading ahih manin, Zeisu’ hong sihna a hang pen a hoih ahi hi.

Hong sihna pen mihingte’ hong itna a kilatna zong ahi hi.

“Ahi zongin eite mawhna nei ihih laitakin eite a dingin Khrih hong si ahih manin Pasian in eite hong it mahmahna thu hong lak khin hi.” (ROM‬ ‭5:8‬ )

Zeisu’ hong sihna pen mawh nei eite hong itna hang bek hi.

“Khrih mahmah zong note a dingin si a, Pasian’ kiangah hong tunpih theih nadingin mihoih khat pen mihoih lote’ mawhna hangin khatvei a si hi. Mite in ama leitung pumpi that a, ahi zongin Pasian in kha nuntakna a pia hi.”

‭‭(1 PETER 3:18‬)

Black Friday pen Good Friday zong ahi hi. Bang hang hiam cih leh leitungmite’ hong itna (John 3:16) hangin a hong thuakna a kicin nading (John 19:30) hong sih ni ahih manin hoih hi.

Ni hoih ni leh a hoih Friday (Good Friday) tungtawn pan hong luangkhia thupha, a zozo leh a zawh sa (haksat gimna khempeuh leh mawhna thaman sihna gute) pan hong tatkhiat ni; a zawh siang khit ni i VANGLIATNA LEH THUPHA nang leh na innkuan tungah hongtung ta hen.